ភ្នំពេញ៖ នាយករដ្ឋមន្ត្រីកម្ពុជា សម្តេចតេជោ ហ៊ុន សែន បានចាត់ទុកសហគ្រាសធុនតូច ធុនមធ្យម និងសិប្បកម្ម ជាឆ្អឹងខ្នងនៃសេដ្ឋកិច្ចជាតិ និងជាដៃគូដែលមិនអាចខ្វះបានឡើយក្នុងការអភិវឌ្ឍសេដ្ឋកិច្ចកម្ពុជា។

សម្តេចថ្លែងបែបនេះនៅក្នុងពិធីពិសាអាហារសាមគ្គីជាមួយមហាគ្រួសារសហគ្រាសធុនតូច ធុនមធ្យម និងសិប្បកម្មនៅកម្ពុជានៅរសៀលថ្ងៃទី១០ ខែមេសា ឆ្នាំ២០២៣។

សម្តេចនាយករដ្ឋមន្ត្រីមានប្រសាសន៍ថាកន្លងមករាជរដ្ឋាភិបាលបានបង្កើតគណៈកម្មាធិការសកម្មភាពគោលនយោបាយលើកស្ទួយសហគ្រាសធុនតូច និងធុនមធ្យមដែលជាយន្តការអន្តរក្រសួង ស្ថាប័នសម្រាប់សិក្សាស្រាវជ្រាវ វាយតម្លៃ និងដោះស្រាយបញ្ហាប្រឈមរបស់សហគ្រាសធុនតូច និងមធ្យមនៅកម្ពុជា។

សម្តេចគូសបញ្ជាក់ថា រាជរដ្ឋាភិបាលបាន និងកំពុងរៀបចំសេចក្តីព្រាងច្បាប់ស្តីពីសហគ្រាសធុនតូច និងមធ្យម និងគោលនយោបាយអភិវឌ្ឍសហគ្រាសធុនតូច និងមធ្យមដើម្បីដោះស្រាយបញ្ហាប្រឈមរបស់សហគ្រាសធុនតូច និងមធ្យម។

សម្តេចបន្តថា កាលពីឆ្នាំ២០២២ រាជរដ្ឋាភិបាលបានបង្កើតធនាគារសហគ្រាសធុនតូច និងមធ្យម ដើម្បីចូលរួម និងគាំទ្រដល់ការអភិវឌ្ឍរបស់សហគ្រាសធុនតូច និងមធ្យមក្នុងបរិបទកូវីដ-១៩។ ទន្ទឹមនេះធនាគារក៏បានបញ្ជេញកម្ចីឥណទានចំនួន ៤០០លានដុល្លារដល់សហគ្រាសជាង ៣ពាន់កន្លែងផងដែរ។

សម្តេចតេជោ បន្ថែមថា ដើម្បីកាត់បន្ថយថ្លៃដើមផលិតកម្ម រាជរដ្ឋាភិបាលបានរៀបចំគោលនយោបាយ ច្បាប់ និងបទបញ្ញត្តិដល់សហគ្រាសធុនតូច និងមធ្យមដែលបានចុះបញ្ជី និងដល់សហគ្រាសធុនតូច និងមធ្យមក្នុងវិស័យអាទិភាព៕